Premio da Cultura Galega para Galego en Londres

Hoxe é un día feliz na área de Galego do Cañada Blanch.

Acabamos de recibir un premio moito máis grande do que nunca soñamos, o Premio da Cultura Galega en Proxección Exterior 🏆. Son uns premios que destacan a excelencia creativa e o labor de difusión cultural de persoas e institucións en varios eidos. Galego en Londres está a recibir o premio na categoría de Proxección cultural no exterior 🌍. Facémolo a carón doutros galardoados de moita categoría: Xesús Alonso Montero en Letras, Soledad Penalta en Artes Plásticas, a compañía Monicreques de Kukas en Artes Escénicas, o cantautor Amancio Prada en Música, a serie de Neflix O sabor das margaridas en Audiovisual, a profesora Pilar Ponte (a benquerida e incansable activista a prol da lingua coñecida como aprofa) en Lingua, e a Fundación Barrié pola restauración do Pórtico da Gloria. Vaia, case nada!

O premio outorgado recoñece no proxecto Galego en Londres a excelencia creativa, a capacidade de intercambio, a experimentación e a proxección da construción cultural de Galicia.

Aquí en Portobello recibimos a noticia con abraio e con moitísima ledicia, porque tanto recoñecemento nunca entrou sequera no terreo do soñado. Pero hai aínda un sentimento maior, que é o da gratitude. A construción de calquera empresa que pague a pena e que se manteña no tempo nunca é cousa dunha persoa, senón de moitas e isto aplica tamén na nosa. Así que o triunfo é compartido: detrás de Galego en Londres estivo varios anos o anterior profe de galego, Xaime Varela, que foi quen tivo a fabulosa intuición de que había que abrir as aulas de galego ao mundo e creou a marca. Estou ben certa que nunca pensou daquela nin que ía durar nin que ía medrar tanto! Cun novo e necesario enfoque, seguía unha saga doutros incribles profesores de galego que cada un ao seu xeito fomentou o orgullo polo propio e axudou a cohesionar a nosa comunidade: Carmen Suárez, Ramiro Fonte, Álvaro Varela Suances-Carpegna e Teresa Fandiño. Agora xa van 30 anos de ensino de galego no Cañada, e eu xa estou a piques de culminar os meus cinco anos en Londres á fronte da área de galego do cole. Mais sei que o novo profe que chegue o ano que vén lle dará continuidade a este proxecto outros cinco máis, e logo o seguinte outros cinco, coas mesmas actividades ou con outras diferentes, pero conservando o espírito: converter o galego en algo emocionante.

Pero, sobre todo, a gratitude é cara aos alumnos de galego, que participan e se entusiasman con todos as propostas que se lle fan nas clases e que son a verdadeira e última razón de todo o que facemos! ♥

Tamén están todos os londoners cómplices do proxecto que acoden altruistamente aos Encontros no Cañada, e entran nas nosas aulas ensinarlles aos rapaces unha mostra do mellor que ten Galicia no humano e no intelectual. Moitos son profesionais altisimamente cualificados e outros grandísimos artistas de paso pola cidade. A lista é xa inmensa. A todos eles correspóndelles tamén un cachiño deste premio.

Grazas finalmente ao xurado por fixarse no traballo feito con tanta dedicación e paixón desde a nosa escola para contribuír á difusión, dignidade, prestixio, vitalidade e futuro da nosa xente e da nosa lingua e cultura!

Hoxe estou feliz por min, por nós e polo pulo que este premio lle dá ao traballo que se realiza desde este recunchiño do IE Cañada Blanch.

Xurado dos Premios da Cultura Galega 2019. Presídeo o conselleiro de Cultura e está composto por representantes do Consello da Cultura Galega, das universidades galegas, da Real Academia Galega, da Real Academia de Belas Artes Nosa Señora do Rosario, da Secretaría Xeral da Igualdade, da Dirección Xeral de Políticas Culturais e de catro persoas de recoñecido prestixio no eido da cultura.

Encontro con Angel García

Hoxe recibimos no Cañada a Ángel García, enxeñeiro informático que traballa como Data Tech Product Manager para a web Hotels.com. Ángel mantivo un Encontro co alumnado de galego de 4ºESO e falounos de como se usan as tecnoloxías máis recentes para crear e mellorar procesos de negocio, mellorar as experiencias dos usuarios e adaptarse á demanda da industria e do mercado.

Ángel explicounos como detrás da nosa actividade en Internet hai unha recollida masiva de datos, e como eses datos se filtran, limpan e organizan para tomar decisións institucionais e empresariais en diferentes ámbitos da nosa vida, desde o tráfico aeronáutico á reserva dun hotel ou á oferta de servizos, e tamén no da saúde e seguridade.

Flightraradar24 danos a posición e ruta de todo o tráfico aéreo mundial varias veces por segundo. Pica aquí
Pica aquí para ver o valor das propiedades de Vancouver, analizada con datos en tempo real

No caso concreto da actividade que desenvolve actualmente para hotels.com, explicounos de que depende o prezo dunha habitación de hotel. As tarifas varían en función de varios factores: onde están, o momento do ano, as estrelas e servizos que ofrecen, a competencia que teñan, e tamén a ocupación e a demanda. Os hoteis varían a tarifa das habitacións ao longo do ano adaptándose a estes factores e a outros, para maximizar as súas ganancias. E a toma de decisións realízase con datos.

Finalmente, a súa charla serviunos para reflexionar e para sermos conscientes da cantidade de datos persoais e de metadatos que cedemos acotío a través do uso que facemos da web e das apps que utilizamos na vida cotiá.

O cine segundo Sandra Sánchez

 

Onte no Cañada o alumnado de galego asistiu á proxección da curtametraxe “A nena azul de Sandra Sánchez, e mantivo un interesante coloquio coa súa directora, a cineasta galega Sandra Sánchez.

 

Con ela asistimos a unha anécdota na vida de Sira, unha nena de 8 anos que un día lata á escola, onde se entende que sofre algún tipo de acoso ou bullying. Sira vai buscar o pai, un percebeiro furtivo, e refúxiase nunha praia deserta onde ten un encontro cunha misteriosa nena que parece ser o seu propio espello. É unha curta sobre o fin da infancia, sobre o momento no que se perde a inocencia, e un prolegómeno da longametraxe de ficción na que está a traballar actualmente, A nadadora, que ten como protagonista a esta rapaza, pero xa con 15 anos. A nena azul amósanos ademais lugares afastados e cargados de maxia de Galicia, como a praia de Camariñas ou a furna de Arteixo, a maneira de falar da Costa da Morte…

A nena azul está a ter unha recepción moi boa, e xa leva gañado varios premios á mellor curtometraxe, como o Premio Mestre Mateo, ou os de Curtocircuíto e Crea. Onte mesmo pola tarde proxectouse en Londres no marco do Galician Film Forum, con grande afluencia de público.

 

Sandra Sánchez leva dirixido e montado multitude de documentais, series e campañas publicitarias para cine e televisión. Entre as súas obras propias a máis destacada é a longametraxe Tralas luces.

Iñaki Leite fálanos de arquitectura e de soños

Este venres o alumnado de galego de 4º ESO e de 1º BAC acudiu a un coloquio cun arquitecto galego moi importante, Iñaki Leite, afincado desde hai anos en Londres, onde ten o estudio Your Architect London. Iñaki falounos da súa formación e historia profesional en lugares como Madrid, Nova York ou Londres, e de como foi aprendendo cousas con outros arquitectos cos que traballou, como Peter Eisenman ou Carlos Seoane.

Explicounos desde unha perspectiva humanística como deseñar a casa dos nosos soños, pero non nos falou de como realizar liñas co Autocad, senón de música, viaxes e cheiros, de como personalizar as casas para obter un fogar, exactamente o que precisamos segundo a nosa personalidade, gusto e inquedanzas. Tamén nos explicou a importancia da luz natural e ensinounos diferentes solucións creativas para distribuila por toda a casa, para imitar un patio, para levala a un soto…

Finalmente presentou un proxecto moi de seu, a multipremiada Dezanove House, unha sorprendente construción na Pobra do Caramiñal cunhas marabillosas vistas cara á Ría de Arousa. Trátase como vimos dunha casa moi singular, xa que está construída con madeira reciclada das bateas e mesmo imita a estrutura das antigas caixas das plataformas onde se cultiva o mexillón. Pero toda ela agocha abraiantes solucións arquitectónicas mesmo nos detalles máis miúdos, e Iñaki foinos explicando como a elección dun material, dun grosor, dunha altura, etc. inflúe na vida cotiá e crea diferentes ambientes e sensacións no interior dunha vivenda.

 

 

Sergio Gantes fálanos da Segunda República

Hoxe o noso alumnado de 3º e 4º da ESO atendeu a unha charla de Sergio Gantes. Sergio é licenciado en Historia pola Universidade de Birkbeck e especialista na Segunda República Española. Fíxonos especial ilusión recibilo porque Sergio estudou non hai moitos anos no Cañada Blanch, onde tamén foi alumno de Galego. Tamén a el lle gustou volver pasear polo convento e lembrar espazos e persoas que o habitaron. O alumnado puido comprobar como hai xa bastantes anos coincidiu nas clases con algún irmán ou curmán máis vello, e mesmo puido indagar como era daquela o cole ou como se comportaban os seus familiares ?

Pero o máis importante foi traballar conceptos como os de ditadura, democracia, república, monarquía e repasar as causas dos conflitos e dos distintos golpes de estado. Aprender da Historia axudaranos sen dúbida a non repetir os seus maiores erros.