Rosalía, Castelao, Celso Emilio, Raúl G Pato, Sechu Sende e Lupe Gómez, no recital literario do Cañada

Hoxe, con motivo da celebración do Día do Libro, tivo lugar no IE Cañada Blanch un recital poético multilingüe no que o alumnado interpretou, recitando e cantando, e incriblemente ben, destacados poemas da literatura española, anglosaxoa, francesa, catalá e galega.

Andrea, Gina e Sahara, de 3º ESO, cantaron ‘Lela‘, de Castelao, co acompañamento ao piano de Elisa; Lucía, de 4º ESO, recitou ‘Irmaus‘ de Celso Emilio Ferreiro; resoaron entre o público versos de Lupe Gómez; Diego, Aitor, Arancha e Alfred, de 2º ESO, recitaron os micropoemas ‘Quérote como‘ de Raúl Gómez Pato; Andrea C., Issy e Adrián, de 2º ESO representaron o conto ‘Uf‘ de Sechu Sende, e, como non, Rosalía, nesta ocasión no bloque feminista ao recitar Andrea B, de 2º ESO, ‘Daquelas que cantan as pombas e as flores‘.

Foi moito o talento amosado pola rapazada, guiada por unha xenial Martina, que exerceu de mestre de cerimonia. Parabéns a todos polas vosas interpretacións e polo voso dominio de tantas e tan fermosas linguas.

 

 

Presentación de “Cruzando a fronteira” no Cañada

A semana pasada tivemos a sorte de poder asistir no Cañada á presentación do documental “Cruzando a fronteira” no Cañada. Este documental é un dos traballos realizados no marco do proxecto “Faros e estacións. Viaxe a Ítaca” por parte do profesorado e alumnado adulto do IES Campo de San Alberto de Noia. Con este proxecto gañaron o ano pasado do primeiro premio Miguel Hernández para proxectos Erasmus+.

Os nosos novos amigos de Noia e o noso alumnado de galego mantiveron un interesantísimo coloquio sobre a vivencia da emigración por parte de tres xeracións diferentes.

Querémoslles agradecer o seu entusiasmo e bo facer aos profes, Suso Montero, Mariela Dosil e Amalia Pérez, e ao alumnado adulto de Ensinanzas Básicas e da ESA o seu marabilloso traballo: Mercedes García, Josefina Malvárez, Carmen Agraso, Miguel Quan e Agustín Somoza. 💙💙

O paso de Luar na Lubre polo Cañada, na radio

O paso de Bieito Romero polo Cañada Blanch deixou a súa pegada tamén na radio.

📻 Aquí podes escoitar a referencia que Belén Regueira fai á nosa escola durante a súa entrevista a Bieito Romero no programa Un país mundial da Radio Galega do 28 de xaneiro. Podes escoitar o extracto aquí, entre os min 1.15 e 1.40.

 

Lucía emociónanos cantando “Chove en Santiago”

Lucía Luque, alumna de galego de 4º ESO, interpreta a capella “Chove en Santiago”, a versión musical de Luar na Lubre do poema “Madrigal á cibdá de Santiago” de Federico García Lorca, un dos seus seis poemas galegos. Bieito Romero quedou abraiado co talento de Lucía. E todos os asistentes tamén. 💕

Chove en Santiago
meu doce amor.
Camelia branca do ar
brila entebrecida ó sol.

Chove en Santiago
na noite escura.
Herbas de prata e de sono
cobren a valeira lúa.

Olla a choiva pola rúa,
laio de pedra e cristal.
Olla no vento esvaído
soma e cinza do teu mar.

Soma e cinza do teu mar
Santiago, lonxe do sol.
Agoa da mañán anterga
trema no meu corazón.

“O son do ar” polo noso alumnado do Cañada

O pasado luns visitounos no Cañada Blanch parte da banda de Luar na Lubre, que está de xira polo Reino Unido.  E o noso alumnado recibiunos interpretando a súa peza máis coñecida e internacional, “O son do ar”.

Paloma no piano, Camila co violín, Lucía Moya coa trompa, Jack coa trompeta, Martina, Cinzia e Marinueva coa guitarra e Elisa co ukelele participaron neste fermoso acto con Bieito Romero, Patxi Bermúdez e David Carril. 😍

Luar na Lubre no Cañada Blanch

Que encontro tivemos no Cañada con Luar na Lubre!!! Bieito Romero e Patxi Bermúdez mantiveron un encontro co noso alumnado nun salón de actos ateigado, dado o interese que esta mítica banda galega de música celta suscitou a súa visita non só entre o alumnado de galego, senón tamén entre outros alumnos e profesores. Bieito falounos da música celta e da música tradicional galega, das conexións atlánticas entre Galicia e as illas británicas, das lendas dos monxes irlandeses sobre Breogán,

Ler máis…

A palabra cantada con Uxía e Sérgio Tannus

Este mércores tivemos dous convidados moi especiais no Cañada: a cantante galega Uxía e mais o músico brasileiro Sérgio Tannus pasaron pola biblioteca do noso centro para lles ofrecer aos nosos rapaces unha charla-concerto cun petisco do mellor da música e da poesía galega e da lusofonía: cantigas tradicionais, versións musicadas de poemas de escritores sobranceiros como Rosalía de Castro ou Uxío Novoneyra, pezas de composición propia e tamén do querido Fran Narf, moi lembrado nesta tarde…

Ler máis…

Uxía + Narf, connosco

Esta semana teremos a sorte de recibir na illa a dous dos grandes artistas galegos: Uxía e Narf (Fran Pérez) presentando o seu último disco Baladas da Galiza imaxinaria. E grazas ao proxecto “Unha artista na escola” de Educabarrié o alumnado de galego do IE Cañada Blanch de Londres poderá gozar da súa música e … Ler máis…