Rosalía, Castelao, Celso Emilio, Raúl G Pato, Sechu Sende e Lupe Gómez, no recital literario do Cañada

Hoxe, con motivo da celebración do Día do Libro, tivo lugar no IE Cañada Blanch un recital poético multilingüe no que o alumnado interpretou, recitando e cantando, e incriblemente ben, destacados poemas da literatura española, anglosaxoa, francesa, catalá e galega.

Andrea, Gina e Sahara, de 3º ESO, cantaron ‘Lela‘, de Castelao, co acompañamento ao piano de Elisa; Lucía, de 4º ESO, recitou ‘Irmaus‘ de Celso Emilio Ferreiro; resoaron entre o público versos de Lupe Gómez; Diego, Aitor, Arancha e Alfred, de 2º ESO, recitaron os micropoemas ‘Quérote como‘ de Raúl Gómez Pato; Andrea C., Issy e Adrián, de 2º ESO representaron o conto ‘Uf‘ de Sechu Sende, e, como non, Rosalía, nesta ocasión no bloque feminista ao recitar Andrea B, de 2º ESO, ‘Daquelas que cantan as pombas e as flores‘.

Foi moito o talento amosado pola rapazada, guiada por unha xenial Martina, que exerceu de mestre de cerimonia. Parabéns a todos polas vosas interpretacións e polo voso dominio de tantas e tan fermosas linguas.

 

 

Coñecemos Galicia: o Camiño de Santiago

O alumnado de galego de 2º ESO segue a traballar para a nosa serie “Coñecemos Galicia“.

O ano pasado durante a viaxe a Galicia comprobamos que Santiago está cheo de peregrinos, e mesmo falamos con algúns deles, como podedes ver aquí. Este ano aproveitamos para afondar un pouco máis no tema a raíz dunha das preguntas que nos formalaron os nosos amigos do IES de Adormideiras, e e este vídeo é froito das investigacións sobre o Camiño de Santiago.

Haberá ósos dentro do sartego na catedral?

Chegaron nunha barca de pedra desde Palestina?

Desde cando Galicia recibe tantos romeiros?

Por que o emblema do Nandos é un galo e que ten que ver iso co tema?

De verdade o Códice Calixtino é un libro tan importante? Por que o roubou o electricista?

Se vedes o noso vídeo saberedes isto e máis.

 

 

Día da poesía con Manuel Antonio

Este mércores é 21 de marzo, comezo da primavera e Día da poesía. O EDLG do CIFP Manuel Antonio de Vigo tivo a marabillosa idea de aproveitar esta efeméride para conmemorar o 90 aniversario da publicación do libro “De catro a catro” do poeta Manuel Antonio.

Unha das actividades que organizaron foi unha lectura colectiva dos 19 poemas do libro, na que colaboraron diferentes centros galegos, nacionais e internacionais, entre eles nós. Velaquí a lista de reprodución de todas as lecturas de todos os centros participantes.

CIFP Manuel Antonio de Vigo (Galicia) | CEG de Granada (Andalucía)  | EOI de Ponferrada (Castela e León)  | CEG de Zadar (Croacia)  |  IE Cañada Blanch de Londres (Reino Unido)  |  IES As Barxas de Moaña (Galicia)  |  CEG de Vitoria (País Vasco)  |  CEG de Budapest (Hungría)  |  CEG de Roma (Italia)  |  CEG de Cork (Irlanda)  |  CEG de Padua (Italia)  |  CEG de Varsovia (Polonia)  |  Ceg de Braga (Portugal)  |  IES Alexandre Bóveda de Vigo (Galicia)  |  IES Álvaro Cunqueiro de Vigo (Galicia)CEG de Estremadura (Estremadura) |  CEE López Navalón de Santiago de Compostela (Galicia)  |  IG Santiago Apóstol de Bos Aires (Argentina)

A nós tocounos ler un dos poemas máis emblemáticos, «Sós». A seleccionada polos organizadores foi a de Marta e Martina, alumnas de 3º ESO.

Claro que fixemos moitas outras propostas, que podedes consultar aquí.

A proxección e coloquio “Cruzar a fronteira” na prensa

A proxección do documental ‘Cruzar a fronteira’ e o posterior coloquio dos seus autores, o alumnado adulto de Noia, co alumnado que estuda galego en Londres no IE Cañada Blanch, tivo o seu eco na prensa:

 

 

Ruta por Portobello co alumnado adulto de Noia

Algúns alumnos de galego de 4º ESO acompañaron á delegación do IES Campo de San Alberto de Noia que veu ao Cañada presentar o documental “Cruzando a fronteira”. Paloma e Marinueva presentáronlles o colexio, Brian faloulles do Portobello galego, Lucía L. e María ensináronlles a Trellick Tower e a Grenfell Tower, Lucía M e José Luis contáronlles as anécdotas do mosaico republicano de Portobello, etc.

Vides de paseo connosco?

 

O IE Cañada Blanch na despedida do Pergamiño Vindel de Galicia

O vídeo no que o alumnado de galego do IE Cañada Blanch recita a Martín Códax en galego e en inglés -feito en colaboración coa Xunta de Galicia e con outros centros de estudos galegos do exterior, como explicamos aquí– formou parte onte dos actos de despedida do Pergamiño Vindel de Vigo. Á prensa non lle pasou desapercibido:

Participamos na campaña da Xunta para despedir o Pergamiño Vindel

Por iniciativa das secretarías xerais de Política Lingüística e de Cultura, os centros de estudo do galego no exterior póñenlle o ramo á programación conmemorativa da estadía do Pergamiño Vindel no Museo do Mar de Galicia con esta peza audiovisual na que o alumnado de galego recita as cantigas de Martín Códax en galego e na súa propia, no noso caso o inglés. O Instituto Español Cañada Blanch de Londres colaborou neste recitados co CEG de Budapest, CEG de Cork, CEG de Deusto, CEG de Kiel, CEG de Roma, CEG de Río de Xaneiro, CEG de Vitoria e CEG de Barcelona.

Ler máis…Participamos na campaña da Xunta para despedir o Pergamiño Vindel