Galego en Londres nun congreso sobre a emigración en Zamora

Falando de Galego en Londres e do activismo cultural na diáspora galega actual

A semana pasada Zamora acolleu o Congreso Internacional: El asociacionismo español de una emigración diferenciada (programa web, programa de man), organizado pola UNED de Zamora e o seu Centro de Estudios de la Emigración Castellana y Leonesa. Nel déronse cita recoñecidos especialistas na materia para debater sobre as características históricas e actuais do asociacionismo da emigración española. Alí estiven falando de Galego en Londres e do papel xogado por este proxecto educativo -que naceu no IE Cañada Blanch, pero que xa hai tempo que saltou os muros da escola- e polas redes sociais que se agrupan baixo este nome na cohesión da comunidade galega de Londres e no desenvolvemento do asociacionismo cultural na cidade.

Tiven o pracer de participar nunha mesa redonda con dous fenomenais contertulios, Serafín Pazos Vidal (responsable de COSLA, a Oficina Europea da Convención de Autoridades Locais Escocesas, que foi promotor da asociación Couto Mixto en Bruxelas) e Alejandra Plaza Rodríguez (escritora e xornalista residente en Frankfurt, presidenta de Embaixada.gal e autora do ensaio sobre emigración Si fuese fácil lo haría otro).

Quérolles reiterar o meu agradecemento aos principais responsables da organización do congreso, Juan Andrés Blanco Rodríguez (director do Centro da UNED de Zamora), Arsenio Dacosta Martínez (doutor en Historia da Universidade da Salamanca) e Rubén Sánchez Domínguez (investigador do Centro de Estudios de la Emigración Castellana y Leonesa), por se fixaren nun proxecto coma o noso e darlle voz á emigración galega actual a través da miña persoa.

Mesa redonda con Serafín Pazos, Alejandra Plaza e XM Núñez Seixas
Pregunta de Ramón Villares durante o coloquio
Apertura do Congreso por parte de José Luis Bermúdez -deputado de Cultura, Educación, Deportes e Emigración da Deputación de Zamora- e de Juan Andrés Blanco -director do Centro Asociado da UNED de Zamora.

 

Galego en Londres na Radio Galega

O programa Un país mundial da Radio Galega fíxose eco do interese polo galego en Londres entre a rapazada do IE Cañada Blanch. Belén Regueira entrevistounos aos dous últimos profesores que ocupamos a praza de galego, o meu predecesor Xaime Varela e eu, Begoña González.

Durante 20 minutos conversamos sobre a escola e os nosos rapaces, sobre os galegos que buscan a vida nas ribeiras do Támese e sobre como xurdiu e a vitalidade actual do proxecto Galego en Londres. Grazas, Belén!!

? Pódese escoitar o extracto aquí. Un país mundial. Radio Galega (21/01/2018).

O IE Cañada Blanch na Televisión de Galicia (TVG)

O Brexit, activado este mes pola Primeira Ministra do Reino Unido, suscitou o interese da prensa e televisión galega.

A TVG trasladouse a Londres para interesarse pola percepción da nosa comunidade sobre este asunto e informarse dos efectos que vai ter nos numerosos galegos que hai na cidade. E unha das súas paradas foi no IE Cañada Blanch, onde lle preguntou aos estudantes de galego pola súa situación e entrevistou á profesora. Os muros do noso cole foron vistos no Informativo mediodía desde todos os recunchos de Galicia e nunha reportaxe máis completa no programa Contraportada da fin de semana.

 

 

Anik Nandi visita o Cañada

Hoxe á hora de xantar recibimos ao sociolingüista Anik Nandi no Cañada Blanch. Anik presentoulle a Maribel Martínez, a directora do centro, o proxecto de investigación que ten entre mans, sobre as motivacións que subxacen ao mantemento da lingua na diáspora, pero tamén tivo tempo para conversar con varios dos rapaces que estudan galego no comedor. A todos eles lles sorprendeu que un indio de Calcuta falase tan ben o galego, pero é que os galegos ‘nacemos’ onde queremos, e non hai dúbida de que Anik é un dos nosos. Como el di, naceu bengalí, pero agora é tamén bengalego.

Anik Nandi sabe moito da transmisión interxeracional da lingua, e de feito é doutor pola Universidade de Edimburgo tras a lectura dunha tese sobre iso. Como nos prometeu, agardámolo nas nosas aulas para que nos fale sobre este asunto en Galicia, en Londres e, por suposto, na súa India, onde o bengalí, malia a ser un idioma falado por máis de 260 millóns de persoas, é unha lingua minorizada.

O galego en Croydon

O alumnado de 4º ESO do IE Cañada Blanch estivo visitando o centro inglés Whitgift School de Croydon. Alí presentaron a nosa escola, valorando un dos seus sinais de identidade, o multilingüismo, e, como non, o galego como unha das linguas do seu currículo.  

Unha visita moi especial

Hoxe recibimos no IE Cañada Blanch unha visita moi especial, a do que foi profe de galego aquí durante cinco anos, Xaime Varela. A súa visita sorpresa emocionou aos rapaces da ESO, que aproveitaron a ocasión para interesarse pola súa nova vida, para lembrar vellas anécdotas e rir xunta ao que fora o seu profesor, … Ler máis…

Premios Cañada Blanch 2015

Onte foi a entrega de Premios Cañada Blanch no noso instituto. O acto foi moi solemne e a el acudiron diversas autoridades: o Embaixador, o Consejero de Educación no Reino Unido e mais o Presidente, Vicepresidente e un Patrono da Fundación Cañada Blanch. Comprobamos con ledicia que o premio á mellor traxectoria educativa dos alumnos … Ler máis…

Hoxe Fala Londres está de estrea!

Si, temos nova web! A partir de agora atoparédesnos aquí, en galegoenlondres.gal. Grazas a  Dinahosting temos un hosting propio á medida das nosas necesidades. E estamos moi contentos de sumarnos á arañeira máis galega co noso novo dominio .gal. Incorporamos todo o traballo feito pola rapazada nestes últimos anos na área de galego do IE … Ler máis…

foto-diversion-ends

Vémonos noutra

Velaí vai a derradeira. Despois destas voltas e reviravoltas polas silveiras da beira do Támesis  toca desencerellarse, poñer o alboroque e regresar a Galicia. Foron cinco anos moi intensos traballando como profesor de galego dende o IE Cañada Blanch; cinco anos tentando saltar os muros do que fora un convento para  facer visible a nosa … Ler máis…

foto Londres mais logo galegoenlondres

Botando contas

Nos últimos días desta xeira de cinco anos parécenos que pode ter certo interese ofrecer un balance en cifras desta experiencia marabillosa. En canto á docencia no IE Cañada Blanch impartimos aulas de galego a unha media de 55 alumnos cada ano, fundamentalmente na ESO pero tamén en Primaria (como materia extraescolar) e nos catro … Ler máis…

O día de Galicia en Londres 2015

Dende hai moitos anos vénse celebrando no IE Cañada Blanch de Londres unha concorrida  festa que organiza o Centro Galego de Londres chamada Día de Galicia. E como cada ano, dende que andamos por aquí, tentamos reflexar o ambiente da mesma nun pequeno vídeo. Desculpade a nosa falta de pericia fotográfica.

Día de Galicia 2014

O domingo 22 de xuño celebrouse o xa tradicional Día de Galicia en Londres no patio do Instituto español Cañada Blanch. Foi un éxito total pois acudiron máis de 2000 persoas. Velaí vai un vídeo-resumo desta xornada festiva.

Correo Gallego - 20.01.2014

Educabarrié + Fala Londres

Hai uns días, o 14 de xaneiro de 2014, recibimos a confirmación de que o proxecto Fala Londres fora un dos seleccionados na convocatoria de proxectos escolares Educabarrié da Fundación Barrié. Dende entón diversos medios de comunicación recolleron a nova, algo que nos agrada e nos fai seguir traballando aínda con máis ilusión. Velaquí algunhas … Ler máis…

Visita do IES Xulián Magariños de Negreira

Hoxe tivemos a visira do alumnadod e 3ESO da sección bilingüe do IES Xulián Magariños de Negreira. Estiveron na aula co noso alumnado que estuda galego en 3ESO comentando as súas experiencias, os seus gustos e usando como linguas vehiculares o galego e o inglés. Unha experiencia moi satisfactoria.

Premios Cañada Blanch 2012

Permitídenos fachendear un pouco. Hoxe na entrega dos premios Cañada Blanch 2012 ao mérito académico, esforzo e compañeirismo houbo moitas distincións para o noso alumnado: Lorena, Antonio, Tania, Vanesa, Oliva, Ian, Sonia, Paula e Lorenzo. E, aquí tedes a Antonio e Tania, recitando a Celso Emilio no acto. (desculpade a calidade do vídeo). Parabéns rapazas. … Ler máis…

Cine galego no outono londiniense

Un ano máis terá lugar nas beiras do Támesis o London Spanish Film Festival, dende o 28 de setembro ata o 10 de outubro. Este ano hai unha bo feixe de producións galegas, desafortunadamente poucas en galego. O martes dous de outubre, proxectarase un dos documentais máis exitosos do ano, Tralas luces, de Sandra Sánchez. … Ler máis…

O Pórtico da Gloria revisitado no V&A

O venres 15 de marzo tivo lugar no V&A Museum de Londres unhas xornadas sobre o Pórtico da Gloria auspiciadas pola Fundación Barrié. Como remate, amais da intervención do novo embaixador que se estreaba nun acto público en Londres, actuou o grupo Martín Códax. Desa actuación, gravamos esta coñecida cantiga de amigo E aquí unhas … Ler máis…

A hostalaría galega en Londres

Dado que sodes moitas e moitos quen nos preguntades por lugares en Londres onde se pode comer algo galego, aí vos deixamos uns cantos lugares que agardamos nos axudedes a completar: Restaurante do Centro Galego de Londres 869, Harrow Road Restaurante Galicia, 323, Portobello Road Laxeiro, 93 Columbia Road La bodega restaurante, 78 Tavistock Road … Ler máis…

Visita do IES Ortegal de Cariño

O pasado venres 25 de maio recibimos outra visita escolar. Neste caso viñeron nove alumnos da sección bilingüe do IES Ortegal de Cariño acompañados polas profesoras de Física e Química e mais de Tecnoloxía. Foi un encontro moi agradable xa que posibilitou que algúns rapaces que estiveran facendo un intercambio epistolar se coñeceses. E tamén … Ler máis…

Visita mugardesa no Cañada

O pasado venres 4 de maio o alumnado de 1 e 2 ESO tivo unha sorpresa inesquecible na aula: 14 rapaces e rapazas de 4º da ESO do IES de Mugardos, acompañados de tres profesoras. Dende o noso blogue queremos agradecerlles que fixeran esta parada no centro durante a súa viaxe de estudos a Londres … Ler máis…

Engurras (Arrugas) en Londres

O vindeiro sábado 21 de abril ás 16h00 no Cine Lumière de Londres e dentro da fin de semana de primavera do London Spanish Film Festival proxectarase Arrugas. Da produtora galega Perro Verde Films e baseada no cómic do Premio Nacional Paco Roca ten no seu haber moitos premios e a aclamación do público. Este … Ler máis…

O recoñecemento oficial dunha ilusión

Vimos de saber que o INTEF (Instituto Nacional deTecnologías Educativas y de Formación del Profesorado) pertencente ao Ministerio de Educación, Cultura y Deporte acaba de recoñecer a este blogue co distintivo de “Buena PrácTICca 2.0″ por acercar a nosa lingua ” a su alumnado de una manera muy enriquecedora que puede servir de modelo a … Ler máis…

Máis cine galego en Londres: curtas

En entradas anteriores demos conta das longametraxes galegas que este ano se proxectaban no London Spanish Film Festival. Pero a presenza galega no festival é maior pois, amais de destacados papeis de actores galegos como L. Tosar en Lope, También la lluvia e Os Crebinski ou Mario Casas e Miguel de Lira, entre outros, tamén … Ler máis…