Coñecemos Galicia: María Pita

Que se sabemos quen é María Pita? A nova pregunta dos rapaces do IES de Adormideira sobre cultura galega ten que ver con esta heroína da cidade da Coruña. Estivemos a investigar e vimos que ten moita relación con Inglaterra, como nos explican Ella, Issy, Alex e Eduardo. Cando vaiamos á Coruña, xa sabemos o que podemos atopar na praza do Concello. Quen teña honra que nos siga!

Coñecemos Galicia: a torre de Hércules

Pregúntannos os rapaces do IES de Adormideiras que se coñecemos a torre de Hércules. Pois si. Algúns xa a vimos e outros non, pero todos nos informamos sobre este faro romano e sobre as lendas da súa construción. Aquí cóntanvolo Diego, Aitor, Adrián e Gabriel. Temos ganas xa de ir ao campo da torre a correr ao lado do mar e a ver a rosa dos ventos e a estatua de Breogán.
Cadraranos na viaxe a Galicia deste curso?

Coñecemos Galicia: a catedral de Santiago

Os rapaces do IES de Adormideiras cos que facemos o intercambio lingüístico fannos unha nova pregunta sobre a cultura galega. Hai algunhas cousas das cidades e monumentos galegos que xa coñecemos e outras aproveitamos para investigalas.
Velaquí o que aprendeu o alumnado de galego de 1ºESO sobre a catedral de Santiago. Cóntannolo Alba, Alfred, Kiara e Laura.

Atrévete con Londres: un paseo polo Southbank

Eloy, Samu e Dani quérenvos alertar. Vides botar uns días a Londres? Pois non deixedes de facer un dos principais itinerarios a pé da cidade, o paseo polo Southbank, desde a ponte de Westminster ata a Torre de Londres. Son moitos os descubrimentos que faredes polo camiño: Drake, Shakespeare, Norman Foster… Ata aquí podemos ler!

Luis Pérez falanos de Instagram na divulgacion científica

Esta mañá 4 alumnos de galego do IE Cañada Blanch participaron no proxecto de innovación que impulsa Luis Pérez González no IES do Castro de Vigo. Pola tarde, Luis pasou polas aulas de 4º ESO e falounos da utilidade do Instagram para a aprendizaxe escolar e para a divulgación científica. Falounos tamén da Xeo Actividade Azores 2017, a primeira experiencia que puxeron en marcha no seu instituto no Departamento de Bioloxía, cando visitaron as illas dos Azores con 11 alumnos de Bacharelato que exerceron de verdadeiros investigadores, exploradores e reporteiros. Alí os rapaces divulgaron a cultura, historia, xeoloxía, bioloxía e os segredos da Illa Terceira: as furnas do Enxofre, a gruta do Natal, a Angra do Heroísmo, o monte do Brasil, o Algar do Carvão…  (Faro de Vigo – Lecciones a golpe de ‘clic’).

De Portobello a Adormideiras 2: o Entroido no Cañada

No proxecto de intercambio lingüístico cos rapaces do IES Adormideiras da Coruña, fixéronnos varias preguntas relativas á cultura galega.
A primeira pregunta era ben sinxela, así que aproveitamos que estamos a finais de febreiro para amosarlles como vivimos as nosas festas: viva o Entroido!
E dámoslles as particulares grazas a Diego e a Keti, por agasallarnos hoxe con filloas, orellas e roscos.

Atrévete con Londres: Portobello

En dúas semanas recibimos en Londres aos nosos amigos do CPI Camiño de Santiago de Arca, así que o alumnado de 3º e 4º da ESO estivo a preparar uns vídeos cunhas suxestións do que non deben perder na cidade. O noso cole está en Portobello, así que o noso barrio ben merece unha visita. Preparados para unha visita con Lucas, Andrea e Ánxeles?

Isaac Xubín fálanos de poesía, linguas e rugby

Onte recibimos con grande alegría no Cañada a Isaac Xubín. Isaac dedícase profesionalmente á tradución, pero é sobre todo un recoñecido poeta e narrador, que vén de publicar hai pouco a novela ‘Non hai outro camiño’.

Isaac falounos da súa traxectoria e da súa busca da identidade, nun longo camiño persoal que comezou en Bilbao e foi recalando en Espinosa, en

Ler máis…Isaac Xubín fálanos de poesía, linguas e rugby

Cooperamos?

Este último venres antes do half term acompañounos nas aulas de galego de 1º ESO a profesora de Economía da Universidade de Santiago de Compostela Marta Vázquez Suárez. Marta formuloulles unha pregunta moi sinxela para empezar: “Queredes gañar cartos?”. A partir deste incipit e a través dun xogo no que os protagonistas foron os rapaces, Marta introduciu nas clases conceptos como a cooperación, a competencia, a confianza, a estratexia, a negociación… aplicados ao mundo da economía e da empresa.

Anik Nandi visita o Cañada

Hoxe á hora de xantar recibimos ao sociolingüista Anik Nandi no Cañada Blanch. Anik presentoulle a Maribel Martínez, a directora do centro, o proxecto de investigación que ten entre mans, sobre as motivacións que subxacen ao mantemento da lingua na diáspora, pero tamén tivo tempo para conversar con varios dos rapaces que estudan galego no comedor. A todos eles lles sorprendeu que un indio de Calcuta falase tan ben o galego, pero é que os galegos ‘nacemos’ onde queremos, e non hai dúbida de que Anik é un dos nosos. Como el di, naceu bengalí, pero agora é tamén bengalego.

Anik Nandi sabe moito da transmisión interxeracional da lingua, e de feito é doutor pola Universidade de Edimburgo tras a lectura dunha tese sobre iso. Como nos prometeu, agardámolo nas nosas aulas para que nos fale sobre este asunto en Galicia, en Londres e, por suposto, na súa India, onde o bengalí, malia a ser un idioma falado por máis de 260 millóns de persoas, é unha lingua minorizada.

Skype co IES de Adormideiras

Hoxe fixemos un skype cos nosos amigos do IES de Adormideiras. O alumnado de 3º e 4º da ESO de Galego en Londres practicou así o seu galego, e a rapazada da Coruña puido empregar o seu inglés e escoitalo da boca dos nosos. En xuño sempre visitan Londres, así que agardámolos por aquí pronto. Mentres, seguiremos a argallar actividades con eles.

Obradoiro de poesía con Diana Varela Puñal

O venres tivemos unha visita moi especial no Cañada. A poeta galega de Corme Diana Varela Puñal veu ás clases de galego de 1º ESO. Diana é gañadora de múltiples premios literarios, tanto no eido da poesía coma no teatro, e é frecuente colaboradora de varios xornais galegos, aínda que profesionalmente dedícase á avogacía nun bufete da Coruña.

Todos xuntos protagonizamos unha sesión de poesía na que escoitamos, interpretamos, recitamos algúns poemas clásicos da literatura galega, como Negra sombra de Rosalía, e outras composicións da propia Diana, como Os amantes de Monbósc, Quixote contra o delirio ou O emigrante.

Pero o máis divertido foi que creamos un poema colectivo

Ler máis…Obradoiro de poesía con Diana Varela Puñal

De Portobello a Adormideiras I – Eu son

Este ano comezamos un ilusionante proxecto de intercambio lingüístico con rapaces do IES Adormideras da Coruña. Eles, xunto co seu profesor Ramón Iglesias, vannos propoñer retos en galego e en inglés, e viceversa. Nós estaremos do outro lado do correo, da web e do Skype para responder e propoñer.

Querédesnos coñecer? Comezamos o post cun vídeo no que o alumnado de 1º ESO do IE Cañada Blanch se presenta. (Fáltanos Eduardo, pero seguro que vos saúda outro día!).

E tamén queremos saber dos nosos amigos, así que témoslles preparadas unhas preguntiñas.

 

A vida é música… e teatro… e cine… con Brais Breijo

Esta semana visitounos Brais Breijo, tenor no coro da Orquestra Sinfónica de Londres, coa que leva cantado en sedes tan míticas como o Lincoln Center de Nova York.

Pero Brais dedicouse tamén ao teatro e ao cine, así que falounos das súas experiencias como actor en series da televisión como Matalobos ou Pazo de Familia, da súa formación teatral en Casa Hamlet

Ler máis…A vida é música… e teatro… e cine… con Brais Breijo

Entrevista a Xaquín Núñez Sabarís

Aproveitando a visita de Xaquín Núñez ao IE Cañada Blanch, Paloma, alumna de galego de 3º ESO, entrevistouno e soubo dalgúns dos misterios de ser profesor. Velaquí o vídeo entrevista que lle fixo coa axuda técnica de Juanes, alumno tamén de terceiro.

O norte e o sur do Miño, con Xaquín Núñez Sabarís

Xaquín Núñez Sabarís, profesor de Literatura Española da Universidade do Minho, en Portugal, vén de visitarnos esta semana no IE Cañada Blanch. No seu encontro co alumnado de galego 3º e 4º da ESO falounos da súa terra, na provincia de Pontevedra, e do norte de Portugal. Dúas terras vinculadas ao río Miño e arredor das que se xestou unha cultura con moitos puntos de encontro.

Xaquín faloulles tamén das linguas, do galego, do español, do portugués e do seu contacto coa cultura brasileira. Grazas/obrigado por acompañarnos!

O galego en Croydon

O alumnado de 4º ESO do IE Cañada Blanch estivo visitando o centro inglés Whitgift School de Croydon. Alí presentaron a nosa escola, valorando un dos seus sinais de identidade, o multilingüismo, e, como non, o galego como unha das linguas do seu currículo.  

O Mannequin Challenge no Cañada | Primaria

Algúns dos cativos de 3º, 4º e 5º de Primaria, que asisten a clases de galego como extraescolar, tamén quixeron facer o seu particular mannequin challenge, así que andaron a buscar material e chegaron á clase cun mapa de Galicia, o texto do himno, láminas de vocabulario, cómics dos Bolechas e de Asterix, unha pandeireta e ata unha camiseta de ‘E logo!’. Ganas non lles faltaban 🙂

Entrevista a sete a Antón Baleato Lizancos

Tras a charla do astrofísico Antón Baleato Lizancos, foron moitos os alumnos de galego de 2º ESO que, interesados polo tema quixeron entrevistar ao noso convidado. Ante tanta paixón, decidimos realizar unha entrevista a sete. E puideron ser máis, de non o impedir a vergoña 🙂

Que luxo terte connosco, Antón!

Un universo en evolución, con Antón Baleato Lizancos

O astrofísico Antón Baleato Lizancos vén de visitarnos no IE Cañada Blanch. Foi unha visita moi especial á que fora a súa casa e a da súa nai Laura, pois hai algúns anos el pasou por aquí como alumno e ela como profesora. En plena adolescencia marchou a Vancouver cunha bolsa e despois a Nova York, á Universidade de Columbia. Agora está a cursar Física Teórica na Universidade de Cambridge.

O alumnado de galego de 2º ESO tivo a ocasión de oír de primeira man explicación sobre a orixe e evolución do universo e das estrelas: protóns, bossoms, quarks, supernovas, o bigbán, a teoría de cordas, a expansión do universo… 


Isto é todo, amigos! Bo verán!

Acabamos un novo curso no IE Cañada Blanch de Londres, intenso e cheo de actividades e de emocións, e tras o traballo ben feito por parte do alumnado de Galego en Londres e de todos os amigos que colaboraron connosco, marchamos de vacacións. Despedímonos como máis nos gusta, con música e con festa nas nosas aulas. Ata setembro, amigos!

 

O actor Avelino González tráenos a mellor narración oral galega a Londres

Este venres vimos de ter no noso centro a Avelino González, un dos máis coñecidos actores galegos grazas ao seu paso por múltiples series de televisión da TVG e ao seu traballo como actor, director e tradutor de teatro. Na actualidade encarna o personaxe de Marcelino na serie  ‘Seis hermanas’ da TVE.

Ler máis…O actor Avelino González tráenos a mellor narración oral galega a Londres

Conexión Londres-Rianxo 2016

Un ano máis, un grupiño de alumnos de 2º ESO que estudan galego no IE Cañada Blanch de Londres e outro do IES Félix Muriel de Rianxo que colaboran co seu Ednl fixeron unha conexión por videoconferencia para se coñeceren e falaren dos seus intereses. Repasamos os mellores lugares e lembranzas de Galicia e de Londres, intercambiamos gustos e … Ler máis…

Letras Galegas 2016: o ‘Bando da clase’

Achégase o Día das Letras Galegas e un grupo de alumnos de galego do IE Cañada Blanch quixeron facerlle unha homenaxe moi especial a Manuel María adaptando o seu ‘Bando do alcalde‘, un dos seus poemas máis reivindicativos, aos tempos modernos. Velaquí o noso ‘Bando da clase‘.