5 anos mantendo o vínculo con Galicia

Ler máis…

Poesía no Cañada con Yolanda Castaño

Yolanda Castaño está de xira polo Reino Unido e unha das súas paradas foi o Cañada Blanch. Que luxo para o alumnado de galego da escola poderse achegar á poesía con ela! 🌍 Falounos da internacionalización da literatura galega -ela, unha das poetas máis internacionais que temos-, 📝 creamos xuntos un poema colectivo 🗣️ e, o máis emocionante, escoitámola recitar.

Yolanda é unha magnífica poeta, con numerosas publicacións en moitos idiomas, e ademais unha activa xestora cultural. Dirixe festivais, obradoiros literarios, ciclos poéticos como «Poetas Di(n)versos» , que axunta os máis prestixiosos autores internacionais, etc. Amais diso, é ben coñecida pola xeneralidade dos galegos por mor do seu paso polo emblemático espazo da TVG «Cifras e letras».

Convidámosvos tamén a acompañar a Yolanda na presentación en Londres do seu primeiro libro en inglés, «Second tongue», organizada pola súa editora, Shearsman Books. Será este mércores ás 7.30pm no Swedenborg Hall, no literario barrio de Bloomsbury.

Saúdo do alumnado das Revoltas de Cabana

A finais do curso pasado os alumnos de Primaria do Cañada que estudan galego como actividade extraescolar, participaron e foron pioneiros nun fermoso proxecto, o Transporte dos desexos: puxemos os nosos mellores desexos sobre un corazón, medusa, pomba… (mirade aquí) e mandámosllelos a nenos enfermos con longos ingresos hospitalarios (mirade aquí), que os recibiron con emoción, como constatou a prensa (21Noticias.com; Crónicas de la emigración).

Agora a súa impulsora, a escritora Alejandra Plaza, vén de recompilar un álbum deste proxecto e foino presentar a Cabana de Bergantiños. Desde alí o alumnado do CPI As Revoltas, pioneiros a canda nós desta iniciativa, mándannos voando un saúdo a Londres. E nós querémolos saudar tamén desde aquí. Bicos a moreas desde Londres, amigos 💛💚💙💜💗

Aquí tedes o álbum completo.