Este mércores tivemos dous convidados moi especiais no Cañada: a cantante galega Uxía e mais o músico brasileiro Sérgio Tannus pasaron pola biblioteca do noso centro para lles ofrecer aos nosos rapaces unha charla-concerto cun petisco do mellor da música e da poesía galega e da lusofonía: cantigas tradicionais, versións musicadas de poemas de escritores sobranceiros como Rosalía de Castro ou Uxío Novoneyra, pezas de composición propia e tamén do querido Fran Narf, moi lembrado nesta tarde…
Non é a primeira vez que Uxía vén por Portobello. De feito xa estivo aquí no 2005 precisamente con Fran Narf, así que este encontro converteuse nunha fabulosa ocasión para lembrármonos del, a quen sempre levaremos no corazón.
A resposta do alumnado foi incrible, á altura do espectáculo:
A prensa fíxose eco tamén do evento:
- ‘A palabra cantada’ llega al alumnado de Londres. El Correo Gallego (1/11/2017)
- Uxía e Sérgio Tannus achéganlle ‘A palabra cantada’ ao alumnado de galego do Cañada Blanch. Noticias Press (1/11/2017)
- Uxía e Sérgio Tannus achéganlle ‘A palabra cantada’ ao alumnado de galego do Cañada Blanch. O Portal da Lingua Galega (1/11/2017)
Foi unha tarde espectacular, un fabuloso preludio do concerto que unhas horas máis tarde Uxía e Sérgio deron tamén no festival de música do mundo TunedinLondon, nos incribles Sands Films Studios.
